انا وجدتي بقلم وليد يسرى

لما كان عندي سبعتاشر سنة رجعت ل ستي بعيط وخاېف وعمال اترعش ولما سألتني فيك إيه
قولتلها إني كنت رايح أصلي العشاء ولقيت الإمام خلص صلاة. فقلت أصليها لوحدي وفجأة لقيت حد بيخبط على كتفي وواقف جنبي والمفروض هصلي بيه. ومفيش كام ثانية إلا وواحد بيخبط على كتف اللي جنبي عشان بقوا اتنين ووقفوا ورايا.
أنا اتلبخت لأني مش حافظ ولا سورة من القرآن.
أنا كنت ولد بصلي كل فين وفين وأخلص وأجري على بره للعب واللف في الشوارع مع العيال
مكنتش عارف أصلي إزاي والناس ورايا وكنت بدعي ربنا الأرض تنشق وتبلعني مكنش قدامي غير إن أقرأ سورة الإخلاص في كل ركعة والمصېبة إن كمان كنت بتلخبط فيها واللي واقفين ورايا يصححوا.
وأنا بصلي حلفت بالله إني لازم اتغير ولما سلمت قلت أنا هبص للناس اللي ورايا وأعتذرلهم وأقولهم إني كنت متوتر لأني

أول مرة أصلي بالناس أو أكذب وأقولهم إن كان عندي ظرف معين في البيت أدارى بيه كسفتي وجهلي لكلام ربنا بس اللي طير برج من عقلي إن بعد ما سلمت ما لقيتش حد بيصلي ورايا
أنا فضلت مبلم كده دقيقة مش عارف ولا فاهم إيه اللي حصل دا أنا يدوب سلمت وبصيت ورايا أكيد مش طاروا يعني.
طلعت جري حتى نسيت أقفل باب الجامع لأن بعد صلاة العشاء الجامع بيتقفل. وخدت شبشي ودورت الجري على البيت. يومها ستي أخدتني في حض نها من غير ولا كلمة. حض نها كان جرعة مسكن رهيبة لكل الخضة اللي أنا فيها دي لدرجة إني نمت ولما صحيت لقيت إمام الجامع عندنا في البيت وفي إيده كباية شاي وبيبص عليا شكله كان مستنيني لما أصحى.
وأول ما صحيت جه قعد جنبي وخلاني أحكي اللي حكيته لستي تاني. مانا مكنش ليا حد غيرها بعد أبويا وأمي اللي ما توا واحد ورا التاني وسبوني ليها تربيني.
وكانت ستي بحكم إنها بتطلع الغيط كل يوم مكنتش بتبقى فاضية ليا طول الوقت وكان كل ما حد من الجيران يشتيكي إنها مقصرة في تربيتي كانت تقول
ربنا اللي بيربي هو احنا نعرف نربي نفسنا لما نربيهم.
المهم بعد ما حكيت للشيخ عبد التواب الحكاية اللي حصلت في الجامع قالي متخفش هما أكيد لقوك مش عارف تصلي بيهم وقطعوا الصلاة ومشيوا وأكيد حرام اللي عملوه بس كل واحد حسابه عند ربنا. قولتله أنا عاوز أحفظ كتاب الله كامل أجيلك إمتى قالي لا يا شيخ إسلام أنا اللي هجيلك.
أنا مكنتش فاهم هو جي ليه ولا ليه بيقولي يا شيخ إسلام. وأنا لو عدوا الصلاة بتاعتي من يوم ما جيت على الدنيا لحد دلوقتي مش هتكمل خمسين صلاة. كل اللي كنت عارفه إني لازم أحفظ القرآن وحفظت القرآن بفضل الله وحفظي له غير
لي حياتي من أول أخلاقي لحد نظرتي للمدرسة وشخصيتي. كل شيء بقى أفضل ببركة وفضل الله.
وعدت السنين أيام وشهور على الحكاية دي. وفي يوم قاعد أصلي الفجر سمعت ستي بتدعي ربنا وتقوله
اللهم لك الحمد إنك ربيته بطريقتك يا رب ومخيبتش دعوتي اللي كل يوم كنت بدعيهالك إنك تربيه وتحسن أخلاقه وتجعله
صالح يا رب طلبت منك إنك تربيه لأني واحدة بتسعى على لقمة عيشها وربيته. يا رب بطلب منك تعز الإسلام على إيده وتجعل منه مثل صالح لغيره.
أنا سمعت دعوتها واستغربت وفضلت أفكر طول الطريق لحد الجامع معقول الناس اللي طلعولي زمان وأنا صغير دول ربنا بعتهم بسبب دعوة ستي عشان أحس إني اتكسفت واتلبخت وتيجي الهداية وأني ينصلح حالي
هو ممكن يا رب تحصل كراما ت بسبب دعوة ست عجوزة مبتفهمش في الدين ولا حافظة قرآن كل اللي كانت بتعمله إنها واثقة في لطفك وكرمك وعمرها ما لجأت لحد غيرك.